En dan is daar Brayn Stephen.
Dié merkwaardige voorman op ‘n #Karoo-skaapplaas is tydens die Wes-Kaap Agriwerker van die Jaar kompetisie aangewys as die wenner in die kategorie: Beste Potensiaal.

“Op skool het ek ‘n vriend gehad wat op Laingsburg gebly het. As ek naweke by hom gaan kuier het, het ek altyd gedink ek wil eendag in die Karoo bly. Dit is bitterlik mooi,” sê Brayn, wat op Piketberg grootgeword het. Sy wens het waar geword en vandag werk hy buite Beaufort-Wes op ‘n plaas wat ook onder die droogte gebuk gaan.

“Die plaas is mooi, maar die wêreld is nou anders. Dit is asvaal en kurkdroog. Ons bemoedig mekaar maar op die plaas. Die droogte is nie die landbou sin alleen nie, dit is die hele land sin. Dit het mense bymekaar gebring. Jy hou aan boer deur ander wat jou bemoedig. Die droogte het my geleer om meer vir ons landbouers te bid.

“Ek het ook my afdae, veral wanneer ons skaap moet skuif en daar ís net nie meer voer nie. Of wanneer dit lamseisoen is en jy sien hoe gooi ‘n ooi haar lam weg. Mens soek altyd iemand om die skuld te gee, maar dan dink ek weer die liewe Vader het ‘n doel met alles. Sekere goed in die natuur gee vir my hoop. Partykeer stap ek in die veld en sien ‘n bossie wat probeer uitloop. Dan het ek weer hoop.

“Ek sien myself nog lank hier. As die reën weer kom, gaan ek groente plant. Tot dan gaan ek aan om leiding op die plaas te neem, die ander werkers te bemoedig, te kyk waar ek hulle dagtake kan vergemaklik en te sorg dat dinge reg loop.”

Baie geluk met die toekenning, Brayn! Dankie dat jy in moeilike omstandighede almal om jou hoop gee!