Rampfonds geskep vir Klein Karoo-boere
Tisha Steyn

September 2018
Oudtshoorn – Die droogte wat die afgelope drie jaar voortduur het Agri Klein Karoo-streekslandbouorganisasie van Agri Wes-Kaap genoop om ‘n droogterampfonds vir boere in die Klein Karoo te skep.
“Die Klein Karoo Disaster Relief is ‘n onderneming sonder winsbejag en is geskep met die doel om boere wat nie meer geld het vir hul diere voer te koop nie, by te staan,” sê Laubscher Coetzee, boer van Volmoed en Agri Klein Karoo (AKK) se verteenwoordiger by Agri Wes-Kaap.
Volgens Coetzee is die hulp bestem vir boere op plase waar dit die afgelope twee jaar glad nie gereen het nie en geen natuurlike of aangeplante weiding oor is nie.
“Die droogtehulp is nie net vir lede van georganiseerde landbou nie, maar vir alle boere, insluitend opkomende boere, wat in die moeilikheid is omdat hulle nie meer voer vir hul vee oor het nie. Ons kan nie toelaat dat diere vrek van die honger nie.”
Coetzee sê individue en instansies, soos kerke in dorpe in die Klein Karoo, Eden en elders in die land nader AKK deurlopend met ‘n aanbod van skenkings. “Ons het dringend voer, vragmotors en brandstof, en geldelike donasies nodig.”
“Ons het reeds twee vragte gras vir ruvoer van boere in Amersfoort in Mpumalanga ontvang. Die vervoer is deur Hendrik van Wyk Vervoer gedoen en die diesel is deur Total SA geborg.”
Volgens Coetzee word droogtegeteisterde boere, of hulle lede van landbouorganisasies is of nie, versoek om deur die landbouverenigings in die verskillende gebiede aansoek te doen vir voer. “Ons maak gebruik van die bestaande netwerk en wil he al die skenkings en verspreiding daarvan moet op ‘n deursigtige en verantwoordbare wyse geskied.”
Die nie-winsgewende maatskappy is geregistreer as Karoo Disaster Relief NPC, handeldrywend as Klein Karoo Disaster Relief (KKDR) . “Die bestuur van die fonds gaan deur Klein Karoo Disaster Relief in samewerking met Agri Klein Karoo, Acker & Maloney Ing en Relief.Life bestuur word,” sê Johan Potgieter, geoktrooïeerde rekenmeester by Acker & Maloney Ing wat die registrasie hanteer het en mede-direkteur van KKDR.

“Ons gebruik Relief.Life Disaster Management Trust, wat in Kaapstad baseer is, vir hul belastingvrye status, wat beteken dat alle donasies aan Relief.Life afgetrek kan word vir belasting. Dit sluit voerskenkings in wat gekwantifiseer word en wat ingevolge Artikel 18A van die Belastingswet afgetrek kan word. Die aftrekkings is van toepassing op alle goedere, soos skenkings van lusern, mielies of bale ruvoer, wat gewaardeer sal word en waarvoor ‘n graderingsertifikaat uitgereik sal word. “Dit is ook belangrik dat bewys van betaling aan ons verskaf word,” sê Potgieter.

Volgens Potgieter word ‘n aftrekking van tot maksimum van 10% van belasbare inkomste vir ‘n belastingsjaar toegelaat. “As die skenking meer as 10% beloop, mag dit oorrol na die volgende jaar en sodoende gaan die voordeel nie verlore nie.”

Die Trust se bankbesonderhede:
Rekeninghouer: Klein Karoo Disaster Relief
Bank: FNB
Rekeningnommer: 62336 798 501
Tak: Stellenbosch (200-620)
Verwysing: Droogte

Kontak Helen Butler by Agri Klein-Karoo se kantoor by [email protected] of 044 279 1425 indien jy ‘n skenking wil maak, of Laubscher Coetzee by 082 898 5941 vir meer inligting.